सत्तारुढ गठबन्धन दलबीच बालुवाटारमा यस्तो भयो सहमति
काठमाडौं – सत्तारुढ दलहरुबीच गठबन्धनमा देखिएको विमतिलाई अन्त्य गर्ने र सर्वसम्मत ढंगले बजेट पारित गर्ने सहमति भएको छ ।
प्रधानमन्त्रीको सरकारी निवास बालुवाटारमा मंगलबार बिहान बसेको बैठकमा दलहरुबीच देखिएको असन्तुष्टिलाई समाधान गर्ने सहमति भएको नेताहरूले बताएका छन् ।
बैठकमा बजेटसहित पछिल्ला समसामयिक राजनीतिक गतिविधिबारे छलफल भएको र सबै दलका नेताहरु गठबन्धनमा देखिएको समस्या समाधान गर्ने विषयमा नेताहरुबीच सहमति भएको एक नेताले जानकारी दिए ।
प्रधानमन्त्री पुष्पकमल दाहाल प्रचण्ड, अर्थमन्त्री डा. प्रकाशशरण महत, गृहमन्त्री नारायणकाजी श्रेष्ठ, एकीकृत समाजवादीका अध्यक्ष माधव नेपाल र जनता समाजवादी पार्टीका अध्यक्ष उपेन्द्र यादवलगायतका नेताहरु बैठकमा सहभागी थिए । तर कांग्रेस सभापति शेरबहादुर देउवा र उपसभापति पूर्णबहादुर खड्का भने उपस्थित थिएनन् ।
एकीकृत समाजवादीले सरकारले बजेट संशोधन नगरे सरकार ढाल्नेसम्मको चेतावनी दिएपछि प्रधानमन्त्री प्रचण्डले गठबन्धनको बैठक बोलाएका हुन् । बजेटमा नेताहरूले राखेको असन्तुष्टिलाई प्रधानमन्त्री प्रचण्डले सम्बोधन गर्ने भएका छन् । एकीकृत समाजवादीका सांसदहरुले संसद बैठकमै बजेट नसच्याए सरकारबाटै बाहिरिने चेतावनी पनि दिएका थिए ।
अध्यक्ष माधव नेपालले पनि कांग्रेस र माओवादीले एकलौटी गरेको भन्दै सार्वजनिक रुपमै विरोध गरिरहेका छन् । सोही कारण सोमबार पनि प्रचण्ड र माधव नेपालबीच बालुवाटारमा भेटवार्ता भएको थियो ।
प्रचण्डले माधव नेपाललाई बजेटको विरोध नगर्न आग्रह गरेका थिए । जनता समाजवादी पार्टीले पनि ‘पहुँचका आधारमा बजेट निश्चित क्षेत्रमा केन्द्रित’ गरेको भन्दै संशोधन हुनुपर्ने अडान राखेको छ ।
कांग्रेसकै बहुमत सांसदले पनि बजेटको विरोध गरेकाले बजेट पास हुन्छ भन्नेमा सरकार अझै ढुक्क भइसकेको छैन । बजेट पास नभएमा प्रचण्ड नेतृत्वको सरकार स्वतः ढल्ने छ ।
