प्रधानमन्त्री प्रचण्ड , ओलि र माधव एकै समयमा विदेश जानुको रहस्य ; के हुँदैछ राजनीति ?
काठमाडौं – संयोग भनौं वा आकस्मिक नेपालका तीन ठूला कम्युनिस्ट पार्टीका अध्यक्ष एकै समयमा विदेश भ्रमणमा रहेका छन् ।
एमाले अध्यक्ष केपी ओली पाँच दिनदेखि कम्बोडिया भ्रमणमा छन् । उनी एक दर्जन नेताहरूका साथमा उनी त्यहाँको निर्वाचनको पर्यवेक्षण गर्न गएका हुन् ।
प्रधानमन्त्री एवं माओवादी अध्यक्ष पुष्पकमल दाहाल प्रचण्ड शनिबार इटाली भ्रमणमा निस्केका छन् । प्रचण्ड संयुक्त राष्ट्रसंघीय खाद्य तथा कृषि संगठनको मुख्यालय इटालीको रोममा आयोजना हुने ‘युनाइटेड नेशन्स फुड सिस्टम २०२३ स्टकिङ मोमेन्ट’ मा भाग लिन त्यसतर्फ प्रस्थान गरेका हुन् । एकीकृत समाजवादीका अध्यक्ष माधवकुमार नेपाल आइतबार इन्डोनेसिया जाँदै छन् ।
एक महिनामा यो उनको तेस्रो विदेश भ्रमण हुनेछ । ओली, प्रचण्ड र नेपाल एकै समयमा फरक फरक देशमा हुनेछन् । जसकारण अहिले नेपालमा पोलिटिकल गतिविधि ठप्प छ । नेपाली कांग्रेसका सभापति शेरबहादुर देउवा भने नेपालमै छन् ।
कांग्रेसको केन्द्रीय समिति बैठकमा उनी व्यस्त छन् । विश्वस्त स्रोतका अनुसार पूर्वराजा ज्ञानेन्द्र शाह अहिले सिंगापुर गएका छन् ।
चिनियाँ कम्युनिष्ट पार्टीका पोलिटब्युरो सदस्य तथा छोङछिङ सहरका पार्टी प्रमुख एवं सचिव युआन च्या च्युन कोलम्बोबाट नेपाल आउन लागेका बेला ओली, प्रचण्ड र नेपाल सबै मुलुक बाहिर रहने देखिएको छ । रकेट वैज्ञानिकसमेत रहेका चिनियाँ नेता युआन श्रीलंकाको भ्रमण सकाएर आउन लागेका हुन् ।
अब चिनियाँ नेताले कांग्रेस सभापति देउवा, राष्ट्रियसभाका अध्यक्ष गणेश तिमिल्सिना र सभामुख देवराज घिमिरेसँग मात्र भेट गर्ने भएका छन् ।
प्रधानमन्त्री प्रचण्ड र संसदमा प्रमुख प्रतिपक्षी दल एमाले अध्यक्ष ओली विदेश भ्रमणमा निस्केपछि नयाँ प्रधानन्यायाधीश नियुक्तिको प्रक्रिया सुरु हुन सकेको छैन ।
प्रधानन्यायाधीश हरिकृष्ण कार्कीले साउन तेस्रो सातादेखि अवकाशमा गएपछि रिक्त हुने पदमा नियुक्तिको मार्ग पनि अवरुद्ध भएको छ ।
